اهلاً بكم في مدونتي الشخصية أنا أبوحمد أكتب في مدونتي مختلف الأشياء التي تلفت إنتباهي وقت ممتع اتمناه لكم 😁
Alblogy Instagram
الأرشيف
أخر التعليقات
  • تحميل...

نعيش بمجتمع معادي للتصوير

لي فترة من الوقت افكر بشراء كامره SLR احترافيه ولكن ما يمنعني ويجعلني أتردد هو نظرة المجتمع الذي نعيش فيه لهواية التصوير.
الناس هنا تتحفظ وتكره التصوير بالفطره، خاصتاً إن كان بكامرات إحترافيه، فأي شخص يمسك بيده كامره SLR ويلتقط صور يكون في موضع الشبهه من أن يكون عميل يعمل لصالح دولة معاديه
فأعرف شخص هاوي تصوير ذهب الى مول الكوت لكي يلتقط بعض الصور وتفاجئ برجال الحراسه يحيطون به اثناء ماكان منهمكاً بإلتقاط الصور ويقولون له إن التصوير ممنوع داخل مركز التسوق هذا.
وشخص اخر اعرفه “دون ان اذكر اسمه” يقول مـتـفـاخـراً انه شاهد اجانب يلتقطون صُور لقصر السيف بمنطقة شرق وطاردهم بسيارته وإتصل على الشرطه الذين طاردو السياره المشتبهه وتم ايقافهم وكانو مجرد امريكان يأخذون لقطات تذكاريه لأحد معالم البلاد وهو قصر السيف وتفاجئو هم بلأمر! وقالو لو ندري ان اناس هنا تتوجس من التصوير ماكان فكرنا بإلتقاط الصور.
الطريف قبل فتره كنت بسوق “لولو هايبر” اشاهد احد المنتجات الإلكترونيه وقمت بتصويره بهاتفي النقال فقط! ليأتي الى رجل الحراسه ويطلب مني أن امسح الصورة التي التقطتها! قلت له اريد ان تشاهد زوجتي المنتج قبل ان اشتريه؟!
في سفري الى اوروبا أجد حريه كبيره في التصوير والناس هناك يبتسمون وودودين جداً.
ما السبب الذي جعل الناس بالكويت تتوجس من التصوير؟ سمعت احد الاراء يقول ان هذه الظاهره بدأت بعد محاولة إغتيال امير الكويت الراحل الشيخ جابر بالثمانينات.

التعليقات

comments

6 تعليقات على: نعيش بمجتمع معادي للتصوير

  • krkor كتب:

    اهني الناس تحارب كل شي حتى الاحلام والطموحات

    صور بيتكم احسلك لوول 😛

  • Ibokhalid كتب:

    هالشعب ما عنده هوايات ،، و اللي يشذ و يتولع بهواية يتمسخرون عليه و يقولون هبة !! مطاعم و سينما و قهاوي

  • تصوير بعض الأماكن مثل قصر السيف او غيره له دواعي أمنية كثيرة ماراح اتطرق لها
    لكن التصوير داخل المجمعات او المحلات التجارية الكبرى المفروض يكون عادي
    على الأقل تصوير المنتجات وأسعار العروض !

    علي أي حال التصوير بالكويت أخذ مجرى الـ هبة !
    يعني الكل اشترى كاميرا cannon ولا غيره من هل ماركات المعروفة
    وقام يتمشى ويصور , والكل صار يفتتح معرض للصور في المجمع الفلاني او او او .. الخ

    انا مو ضد التصوير لكن ضد التقليد الأعمى وخلاص عاد خلونا نبطل كل ماصار شي هبينا فيه :\

  • خالد كتب:

    انا استعجب من اللي يستنكر منع التصوير في بعض الاماكن
    الممنوع ممنوع لا نقول اوروبا ولا امريكا
    اماكن حساسة ممنوع التصوير كالديوان الاميري او قصر الحكم (السيف) العامر
    الجواسيس والعملاء تارسين البلد وكل فترة يصيدون كم واحد
    واحنا مجتمع مسلم محافظ لايقعد المصورين يصورون خلق الله على ابو هواية
    هذي خصوصية مجتمع.
    اما بخصوص لولو هايبر ايسوون جذيه عشان المنافسة
    ومالهم حق يمنعون احد من تصوير المنتجات وعندكم التجارة واشتكو
    ياشعب الكويت الى متى واحنا نتذمر
    وانتحلطم لازم نبدأ التغيير اول شيء انفسنا
    ونخلي عنا الانانية ونفهم حقوق الاخرين ونحترم الدور ولانسفط سياراتنا غلط
    او نسكر على الناس
    ولانلعب بالايفون او البلاك بيري واحنا نسوق السيارة بسرعة عالية على الحارة اليسار
    وطز في باجي الناس
    يا ناس يابشر والله عيب بعض الناس مادري وين متربي
    عنده انه انسان والباقين حيوا……..

  • Q8LOL كتب:

    والله انا من فتره نفسك قاعد افكر اشتري كامره حلوه .. مو عشان اصور مناظر وهاذا لأني احتاجها بحياتي اليوميه للمدونة وللأماكن الي انعزم فيها ومحتاج الكامره فيها .. منها احفظ الصوره تذكار ومنها استفيد منها للمدونة او للشغلات الظروريه مثل موقف صار قدامي وبحزتها حلاتها تكون الكامره موجوده .. ورحت واخذت كامره مو عاد بروفيشونال وشغل كانون ولا اس ال ار … اشتريت كامره بناسونيك لوميكس .. 14 ميقا بكسل شغل عدل فيها زوم وشاشه وفلاش وكل ملتلزمات التصوير .. وفلاش 2 قيقا شغل عدل .. 🙂 .. بس اكتشفت نفس كلامك لما بديت استعملها بكثره هالفتره من دعوات و مباريات العموم يتصدد وحسيت الكل يوخر حتى ربعي ! .. عسى ماشر ترى الكامره ما تاكلك ! .. اضن الكل مقتنع انه الكامره اذا صورتك بتطلع مفصخ 🙂 .. على العموم مشكور وصج هالشي صاير فيني من فتره وقاعد اوسوس نفسك كل مكان اروح له واكون معزوم بأسم المدونة او ودي اصور شي اقعد اتلفت وانتبه اصور شنو واوخر الفلاش عن منو .. وممكن يرضون بالتصوير هني ولا يمكن يجوني ويحرجوني ويقولون لي امسح ولا ممنوع .. فقمت اخذ حذري حيل قبل لا استخدمها 🙂

  • Alblogy كتب:

    ههههه

    طلعت مثلي يا Q8lol

    انا ظليت فتره اروح وارجع على هذه الخرابه احاول اصورها وماني قادر! .. انتظر اللحظه اللي الناس تبعد عيونها عني لكي اخطف والتقط الصوره هذه.. نظرات الشك تطاردني مع ان عندي كامره صغيره وليس كامره SLR :-/

اترك رد