اهلاً بكم في مدونتي الشخصية أنا أبوحمد أكتب في مدونتي مختلف الأشياء التي تلفت إنتباهي وقت ممتع اتمناه لكم 😁
Alblogy Instagram
الأرشيف
أخر التعليقات
  • تحميل...

هذه المكالمات من ورائها؟

تلقيت مكالمه الظهر من رقم غريب 222515xx وما ان رديت عليه واذا بصوت شاب كويتي او “بدون” يتكلم ودار هذا الحوار:

المتصل: أخوي السلام عليكم
أنا: وعليكم السلام.. هلا ؟
المتصل: معاك شركة البـِـشِـر
أنا: بس أخوي إحنا ما عندنا مرسيدس!
المتصل: انا متصل عليك لأن رقمك طلع عندنا بالكمبيوتر وربحت معانا مجموعة كوبونات.. ممكن تشرفنا علشان تستلمهم؟
أنا: …اخوي أنا مشغول الحين.. بعدين اكلمكم!
المتصل: أسفين على الإزعاج.. مع السلامه

وبعد حوالي 3 ساعات تلقيت إتصال من نفس الرقم! لكني لم ارد عليه..
من يقف خلف هذه المكالمات؟ هل هي شركات إعلانيه تبيع الوهـم، ام بالفعل ربحت كوبونات لكن راحو علي!
لاحظت ان المتصل لا يعرف إسمي،  اعتقد انه اختار رقمي عشوائي.

التعليقات

comments

10 تعليقات على: هذه المكالمات من ورائها؟

  • Frankom كتب:

    قبل حوالي 6 سنوات في شركة مأجرة مكتب مادري دور كامل في السالمية بالاس المجمع اللي فيه أرماني بالسالمية على الزاوية

    المهم أنا أدري انه كله كلك ونصب واحتيال فقررت اني أروح أنا ورفيجي طبعا لما رحنا قالي الحبيب مبروك وربحت ومادري إيش بس علشان تستلم الهدية لازم تشترك معانا !! قلتله هدية ربحتها أشترك معاكم شكو ؟؟؟ في هدية ولا ماكو ؟ قال في في بس لازم تشوف عرضنا قلتله من الحين أقولك ماراح آخذ شي منكم .. قعد نص ساعة يقولي :

    احنا شركة نوفر خدمات للسفر يعني لو أشترك معاهم وأدفع بالسنة 50 دينار مادري 100 دينار يطلعلي بالسنة اسبوع كامل فندق على اختياري … ان شاءالله لو أروح أغلى دولة بالعالم وأغلى فندق أقولهم واهمة يسوون كل شي حقي

    المهم

    تميت على كلامي وماخذيت منهم لا حق ولا باطل (طبعا مابي أدش في تفاصيل شلون عندهم ارقام التلفونات واذا كانت شركات الاتصال في ذلك الوقت باعت الارقام على الشركة مقابل مبلغ رمزي) الله أعلم

    المهم

    رفيجي قال أبي أجرب ودفع وخذى الهدية وأنا عمك أصمخ … طبعا هددتهم وقلتهم راح أفضحكم بالجرايد ومن هالكلام بس هم عمك اصمخ

    المهم

    رفيجي قرر يروح لبنان وهالكلام كان 2004 ورحت أنا معاه والله وكيلك قالوا لنا فندقكم بمنطقة تبعد عن بيروت 20 دقيقية … طبعا الـ 20 دقيقة هذي لو أنا دايس 180 يعني ساعة عن بيروت يعني ياختصار المنطقة هذي بدولة ثانية

    نصب مابعده نصب

    وصدقني سو مثلي

    لما يدقون علي يقولون ربحت أقولهم صج يقولون إي … أقولهم تبرعوا فيها للمساكين أنا مابي شي … يندقرووووووووووون دقرة مو طبيعية 🙂

    طولت عليك

    بس الزبدة

    انت ماتحتاج لا كوبونات ولا بطيخ

    وعطهم 101 وريح بالك

    • Alblogy كتب:

      ولد خالي راتبه 2000 دينار بالشهر!

      اتصلو عليه شركه من هالشركات وصدقهم وراح مشى لمكتبهم بمجمع البستان بالسالميه وانا كنت معاه

      وكان يمدحهم قبل ما يدخل عليهم وانا احذره واقول ديربالك منهم!
      المهم دخل المكتب واخذ واحد يشرح ويحاول يقنعه بالعرض

      وبلاخير شفت ولد خالي يطلع منهم غاضب يقول طلعو يبون يدفعوني فلوس مقدم علشان اسبوع واحد بالسنه بأحد فنادق لبنان.. وقال خلهم يولون!

      رديت عليه قلت له شفت شلون مو قايل لك انا بلاول!

  • welli كتب:

    لما تواجه مندوبهم راح يطلب منك دفع 15 دينار رسوم وزارة التجارة 🙂 مقابل خصومات تافهi ممكن تحصل عليها بدون كوبونات :-/

  • Sn3a كتب:

    انا اللي كلمني من هالشرذمه جنسيته عربيه
    بس قلتله ماحتاجهم
    انا اكره مسجات الاعلانات فما بالك بالمكالمات

  • ناصر الكويت كتب:

    شركات نصب يديرها وافدين بأسماء ابناء تاجر معروفين ,,, الحل انك تجعله يتكلم ثم ترقعه بوجهه

  • هورنت كتب:

    عطه صوت القطار الي يتصل عليك !!

    قوله تعرف صوت القطار ؟ اذا قالك لا ،، ارقع التلفون بوجهه وراح يسمع صوت طوط طوط طوط وهذا صوت القطار 🙂

    ابعد عن هالشركات دبسوا واحد من الربع بمبلغ وقدره ولا افتك منهم إلا بتنازل بدفع ربع المبلغ الإجمالي

    الله يبعدنا وياكم من النصب الي تارس الديرة

  • velvet كتب:

    هذي شركة خصومات حالها من حال الشركات اللي تارسة الديرة بطاقات خصم وكوبونات ماتستفيد منها شي

  • الراية كتب:

    صارت وياي ولعبت فيهم لعب في شركة بمجمع الخليجيه مجابل معهد انفو سنتر لووووول تخيل المفروض يقعد وياي نص ساعه لي ساعه قعدت اناجره واداحره ساعتين حتى مسئوله اخر شي يه لاوي البوز جان يقول مر بعد 10 ايام اخذ هديتك قلت له ما ابيها انا ياي اوسع صدري شوية ومحتاج اتناجر 😎

    • Alblogy كتب:

      هاها 😀
      كفو يالرايه زين تسوي فيهم .. لو في عشره منك كان راح تختفي هالشركات المزعجه هذه

      اذكر سالفه قبل سنين صارت لوحده من المواطنات.. صدقت اللي كلموها بالتلفون وراحت لهم .. المهم خلوها نشوف ندوه مع الاشخاص الضحايا اللي مثلها والندوه كانت عن انجازات الشركه وعروضها و.. و..
      بلاخير قالت لهم وين الهديه اللي قلتو راح تعطونياها ضيعتو وقتي.. قامو وعطوها مطارة شاي اي كلام!

      انصدمت من هديتهم! وعرفت انها كلت مقلب .. ومسكت المطاره ورمتها على الارض وقالت هاكم مطارتهم!

  • النوخذه بن عيدان كتب:

    والله انا اشتركت مع البشر بس عشان الخصم الي بقراج البشر(اكتشفت انه مو قراج البشر الوكاله ) اما السوالف الباجيه ملوت الكابونات مو حق الكويتين كلش يعني تفيد الوافد اكثر

اترك رد